Oktabr 23, 2021

Bong.uz

"JAMIYAT" GAZETASI SAYTI

Кечагидан яхши…

 209 total views,  25 views today

Сайлов арафаси ижтимоий тармоқларда юртдошларимизнинг, жумладан, ёшларимизнинг фикрини чалғитишга қаратилган турли пост, видео ва аудиороликлар айланмоқда. Бундай ғоявий таҳдидларга ҳамма ўз фикрини, позициясини билдиряпти.Аммо орамизда уларга хайрихоҳлар ҳам йўқ деб бўлмайди.

Бизни хурсанд қиладиган жиҳат, бугунги одамларимиз сиёсий жараёнларнинг масъулиятини чуқур ҳис этадиган, жамиятимиздаги тинчлик ва барқарорликнинг шукронасини қилиб, уни мустаҳкамлаш йўлида бел боғлаганча меҳнат қилаётган бағрикенг,
сабр-тоқатли, мулоҳазали инсонлардир.

“Бизнинг бировлардан устунлигимиз муҳиммас, кечаги ҳолимиздан устунлигимиз муҳим”, деган гап бор. Дарҳақиқат, кейинги йилларда оддий турмуш-тарзимизда, оилавий шароит, рўзғоримизда реал ижобий ўзгаришлар бўлганини ҳеч ким инкор этолмайди.

Бир вақтлар пластик картани нақд пул қилиш илинжида унга-бунга илтимос қилиш, нақдлаштириб берган одамга юракни юлгандек қилиб маълум фоизини қолдириш каби ҳолатлар бугун тушга айланди.

Шундай пайтлар бўлдики, яқинда байрамини нишонлаган ўқитувчи-муаллимларимиз қишлоқда маошининг маълум фоизи “нақдлаштирадиган” жойга, маълум фоизини туман марказига бориб, нақд қилдириб берадиган одамнинг чўнтагига киришига кўникишган эди.

Пойтахтда “прописка” йўқлигидан турар-жойида минглаб ёшларимиз “участкавой”лар билан ит-мушук бўлиб, ишлаётган жойидан айрилиб қолмаслиги учун юрак ҳовучлаб яшарди.

Битта муҳрнинг йўқлиги дастидан пойтахтда яшаш ва ишлаш орзусидан воз кечиб кетган ҳамюртлармиз қанча эди.

Яқинларининг операцияси учун хорижга олиб боришга банклардан хорижий валюта ололмай, сарсон-саргардон бўлган инсонларнинг гувоҳи бўлганмиз.

Минг шукурки, бугун инсоннинг иззат-нафсини топтайдиган бундай ҳолатларга барҳам берилди. Аммо баъзиларимиз ҳаётимиздаги бундай ўзгаришларни унутиб, янги-янги эҳтиёжларимизни қондириш илинжида дод солаётгандекмиз.

Бугун шифокорнинг қизи, чорвадорнинг ўғли, фермернинг, прокурорнинг боласи ҳам билими бўлса, теппа-тенг олий ўқув юртига ўқишга қабул қилиняпти, таълимдаги  ўзгаришлар қанчадан-қанча оилаларимизга қувонч, келажакка ишонч бағишлади.

Хуллас, кечаги кунимиздан хулоса чиқариб, эртамиз учун режалар қилишдан чарчамайлик. Улуғ адибимиз Мақсуд Шайхзода ҳол-аҳвол сўраб келган шогирдларига “Аҳволим кечагидан яхши, эртангидан ёмон”, деб жавоб бераркан. Шайхзода домла лутф қилганларидек, ҳаётимиз кечагидан яхши, эртангидан ёмон бўлаётгани рост бўлсин!

Нурали ШОДИЕВ,

Давлат бошқаруви академияси доценти, сиёсий фанлар бўйича фалсафа доктори (PhD)